Mkuu wa Mkoa wa Manyara Azungumza na Watumishi wa Umma Wilayani Kiteto Leo Tarehe 05.07.2017

Imetumwa : July 5th, 2017

Mh. mkuu wa mkoa wa Manyara Dkt. Joel N. Bendera akizungumza na watumishi wa umma katika ukumbi wa halmashauri ya wilaya ya Kiteto.

Katibu tawala wa mkoa wa Manyara  Bw. E. Maswi akizungumza na watumishi  wa umma katika ukumbi wa halmashauri ya  wilaya ya  Kiteto

                   Mkuu wa wilaya  ya Kiteto Mh. T. Magessa akizungumza na watumishi  wa umma katika  mkutano huo.

Watumishi wa umma wakiwasikiliza kwa makini  viongozi wao kama inavyoonekana katika picha.

Habari kamili.

Mh. mkuu wa mkoa wa Manyara Dkt. Joel N. Bendera amefanya ziara wilayani Kiteto kwa lengo la kuzungumza na watumishi wa umma. Katika ziara hiyo Mh. mkuu wa mkoa alifuatana na katibu tawala wa mkoa wa Manyara  Bw. Eliakimu Maswi pamoja na maafisa waandamizi kutoka katika ofisi ya mkuu wa mkoa  wa  Manyara.

 Akizungumza na watumishi wa umma katika ukumbi wa halmashauri ya wilaya ya Kiteto Mh. mkuu wa mkoa wa Manyara amesema  kwamba kila mtumishi  wa umma anatakiwa kuwajibika ipasavyo katika kutekeleza majukumu yake. Uwajibikaji huo lazima uende sambamba na kufanya kazi kwa pamoja (team work) ambapo  watumishi wote pamoja na wakuu wa idara wanatakiwa kufanya kazi kwa pamoja .Aidha mkuu wa mkoa  amewataka wakuu wa idara kuwa na maono, uthubutu na uzalendo katika utekelezaji wa majukumu yao, moyo wa uzalendo ni muhimu ili kuweza kusimamia kwa uangalifu,rasilimali zilizopo pamoja na mapato,na kuwa  wabunifu na wenye bidii katika kutekeleza majukumu yao   ili kutomkwamisha mkurugenzi wa halmashauri. Mkuu wa mkoa pia amewataka watumishi wa  umma kubadili mitazamo yao, ili kuweza kuenda sambamba na kasi  ya awamu ya tano.

Katika mkutano huo, katibu tawala wa mkoa wa Manyara amesisitiza uadilifu, ambapo watumishi wote wa umma wametakiwa kuwa waadilifu katika utumishi wao, kwani uadilifu ndio utakaowawezesha  kuwatumikia vema wananchi kwa kuwapa  huduma ambazo wananchi wataridhika na kwamba kwa kuwa waadilifu ndipo wataweza kujenga utumishi mzuri, usio na lawama kutoka  kwa wananchi.

Naye mkuu wa wilaya  ya Kiteto  mheshimiwa Tumaini Magessa amesema  kwamba  kila mtumishi abadilike ili kwenda  na kasi ya awamu ya tano, kama kauli mbiu ilivyo ya hapa kazi tu, ni kufanya kazi kweli kweli.Lazima watumishi wote wa umma wakubali  mabadiliko.

Pia mkurugenzi mtendaji wa halmashauri ya wilaya ya Kiteto bwana Tamim Kambona amesema  kwamba uwezo wa halmashauri kimapato bado ni mdogo ukilinganisha na huduma ambazo halmashauri inatakiwa kuzitoa kwa wananchi na ukubwa wa eneo la wilaya ya Kiteto kijografia lakini watumishi wote wanatakiwa kufanya kazi kwa ushirikiano, kuacha kuongea mambo ambayo hayana tija, na badala yake waongee yale ambayo yatasaidia kuwajenga zaidi ili kuboresha utendaji kazi katika halmashauri. Kadhalika Mkurugenzi  amewataka  wakuu wa idara kufanya kazi kwa bidii, na pale wanapokutana na changamoto yoyote wamshirikishe ili kwa kushirikiana nae waweze kutatua changamoto hizo.