RC Mnyeti Avunja Uongozi wa Kijiji Wilayani Kiteto

Imetumwa : January 18th, 2018

Wakazi wa Kata ya Kijungu Wakimsikiliza Mkuu  wa Mkoa wa Manyara Mhe. Alexander Mnyeti  Kwenye  Mkutano wa Hadhara uliofanyika katika Kata Hiyo Wilayani Kiteto

                                             Mkuu  wa Mkoa wa Manyara Mhe. Alexander Mnyeti Akizungumza na Baadhi ya Wananchi Mara Baada ya Mkutano wa Hadhara Uliofanyika Katika Kata ya Kijungu Wilayani Kiteto

RC  Mnyeti Avunja  Uongozi wa Kijiji

Mkuu wa mkoa wa Manyara mheshimiwa Alexander Mnyeti  ameuvunja  uongozi  wa kijiji  cha Kijungu kilichopo katika kata ya Kijungu wilayani Kiteto baada ya kugundua kuwa kuna matumizi  yasiyoeleweka ya fedha za kijij yaliyofanywa na uongozi huo wakishirikiana na diwani wa kata ya Kijungu bibi Mandalo Mussa. Tukio hilo limetokea katika mkutano wa hadhara uliofanyika katika kata ya Kijungu wilayani Kiteto.

Akiwa katika mkutano huo Mhe. Mnyeti alimtaka mwenyekiti wa kijiji hicho  kutoa maelezo  kuhusu fedha hizo za kijiji , ambapo maelezo yake yalisababisha Mhe. Mnyeti kutoa amri ya kukamatwa kwa mwenyekiti  huyo  kwa tuhuma za kushiriki katika wizi wa  fedha za wananchi. Kadhalika  Mhe. Mnyeti aliwaita wajumbe wote wa serikali ya kijiji, na kuwahoji kuhusu fedha hizo .Hata hivyo maelezo yao yalimsababisha Mhe. Mnyeti kufikia maamuzi ya kuuvunja uongozi wa kijiji hicho. Akizungumza wakati anatoa maamuzi hayo Mhe. Mnyeti anasema ‘‘Nimeuvunja rasmi uongozi wa kijiji hiki.Hatuwezi  kuwa na viongozi ambao wanaiba  fedha za wananchi. Mkurugenzi itisha uchaguzi mara moja kijiji hiki  kipate uongozi mwingine”.

Katika kata ya Kijungu kumekuwa na mgogoro ambao umedumu kwa muda sasa kati ya Mhe. diwani wa kata hiyo na mwenyekiti wa kijiji cha Kijungu ,mgogoro  unaohusisha matumizi ya fedha za kijiji ambayo yanadaiwa kufanywa na Mhe. Diwani wa kata ya Kijungu kinyume na makubaliano yaliyokuwepo kati ya uongozi wa kijiji hicho na Mhe. diwani, hali ambayo imesababisha Mhe. diwani huyo kukamatwa na kuwekwa mahabusu siku chache  kabla ya ziara ya Mhe. Mnyeti katika kata hiyo.