''Nataka Watu Waje Wajifunze Kiteto '' Naibu Waziri Waitara

Imetumwa : December 15th, 2018

Naibu waziri wa Or -TAMISEMI  Mhe. Mwita M. Waitara akitoa maelekezo kuhusu ujenzi wa jengo jipya la ofisi za halmashauri ya wilaya ya Kiteto , wakati wa ziara yake wilayani Kiteto mapema leo.

............. HABARI KAMILI ...........

Naibu waziri wa Ofisi ya Rais Tawala za Mikoa na Serikali za Mitaa ( TAMISEMI) Mheshimiwa Mwita M. Waitara amesema kwamba kwa muda mfupi aliofanya ziara katika wilaya ya Kiteto ameona mambo mazuri ambayo anataka watu waje wajifunze .Mheshimiwa Waitara ameyasema hayo leo tarehe 15.12.2018 wakati wa ziara yake  katika wilaya ya Kiteto , mkoani Manyara .

Akizungumza mara baada ya kukagua  miradi ya ujenzi katika shule za Sekondari  za Kiteto  na Engusero pamoja na shule ya msingi Twanga Mhe. Waitara amesema “Kwenye awamu hii kwenda mpaka Januari kuna fedha zitakuja, nimeona tayari zimeshatengwa  kwa ajili ya ujenzi na madarasa na matundu ya vyoo kwa shule za msingi Kijungu,Makame na Mbikasi.Kwa mtindo ambao nimeuona hapa, naamini kwamba nyie Kiteto mtapata madarasa zaidi ya haya.Na ikiwezekana mzidishe usimamizi.Na sisi tutajitahidi tusukume ili fedha hizi zije , tuje tuangalie.Nitataka watu wafuate mtindo wenu, hii inaweza ikapunguza mzigo kwa serikali.Kwa sababu mahali pengine watu wanapewa 6,600,000/= wanajenga matundu sita ya vyoo wanakaa wanatulia, lakini nyie badala ya matundu sita mmejenga matundu 12 , badala ya madarasa matatu, mmejenga madarasa manne na ofisi  na kwa fedha hizohizo mmetengeneza madawati 60.Ni lazima watu waje wajifunze kwa nini hapa imewezekana, na wao kwa nini wanashindwa’’.

Mheshimiwa Waitara amesema kwamba changamoto kubwa ambayo wao kama serikali wanayo ni matumizi ya fedha, na kwamba changamoto hiyo  inatokana na watu kutumia fedha za serikali vibaya, watu kutojiongeza, ambapo  wamekuwa wakiishia kutekeleza miradi kwa idadi ileile waliyopangiwa ,hata kama fedha hizo  zingeweza kutosha kufanya zaidi ya idadi hiyo. Kitu ambacho kwa Kiteto imekuwa tofauti kwamba  wamefuata maelekezo ya serikali, lakini pia wameweza  kuongeza majengo na samani kwa kutumia kiasi hichohicho cha fedha,  na zaidi ya yote   wamezingatia viwango vya ubora katika ujenzi  .

Mheshimiwa Waitara pia ameipongeza Halmashauri kwa kutumia fedha za ndani kwenye miradi mbalimbali, kama vile ujenzi wa bweni katika shule ya sekondari ya Kiteto ,bweni ambalo limeshapauliwa, na ujenzi wa bwalo ,ambalo liko katika hatua ya lenta na kuongeza fedha kiasi cha shilingi 20,000,000/= katika umaliziaji wa mabweni na ununuzi wa vitanda katika shule ya sekondari ya Engusero  pamoja na miradi mingine mingi katika sekta ya elimu na afya.Kadhalika mheshimiwa Waitara amewapongeza  wakazi wa kiteto kwa uchangiaji mzuri wa miradi ya maendeleo sambamba na usimamizi mzuri wa miradi, jambo ambalo limewawezesha  kutekeleza miradi mingi  katika ubora. Aidha Mhe. Waziri amesema kwamba ameyapokea na ameahidi kuyafanyia kazi  maombi yote yaliyowasilishwa  wakati wa ziara yake  .

Katika ziara yake hiyo ya siku moja Mhe Naibu waziri Waitara ametembelea maeneo mbalimbali kwa lengo la kukagua miradi ya maendeleo.Maeneo hayo ni Jengo jipya la ofisi za halmashauri, shule ya msingi Twanga, Shule ya sekondari Engusero na shule ya sekondari ya Kiteto,ambako pamoja na ukaguzi wa ujenzi wa bweni ,pia ameweka jiwe la msingi katika bweni hilo.

..........MWISHO...........