Mkuu wa Mkoa wa Manyara atoa Siku 14 Kupatikana Uongozi Mpya wa Hifadhi ya Msitu wa SULEDO Kiteto

Imetumwa : January 16th, 2018

Mkuu wa Mkoa wa Manyara Mhe. Alexander Mnyeti akitoa maelekezo kuhusu SULEDO  katika mkutano wa hadhara uliofanyika  katika viwanya vya soko, kata ya Sunya - wilayani Kiteto

                   Mkuu wa wilaya ya Kiteto Mhe. Tumaini Magessa akitoa ufafanuzi kuhusu mwongozo wa SULEDO  katika mkutano wa hadhara uliofanyika  katika viwanya vya soko, kata ya Sunya - wilayani Kiteto

        Wakazi wa kata ya Sunya wakimsikiliza Mkuu wa Mkoa wa Manyara Mhe. Alexander Mnyeti alipokuwa akizungumza nao katika mkutano wa hadhara uliofanyika  katika viwanya vya soko, kata ya Sunya.

                                                                                        ...................HABARI KAMILI..............

Mkuu wa Mkoa wa Manyara  atoa Siku 14 Kupatikana Uongozi Mpya wa Hifadhi ya Msitu wa SULEDO Kiteto

Mkuu wa mkoa wa Manyara mheshimiwa Alexander Mnyeti  amemuagiza mkuu wa wilaya ya Kiteto  mheshimiwa Tumaini Magessa  kusimamia na kuhakikisha kwamba  hifadhi ya Msitu wa SULEDO inapata uongozi mpya ndani ya siku 14.Mhe. Mnyeti ametoa agizo hilo katika mkutano wa hadhara uliofanyika katika  viwanja vya soko, kata ya Sunya wilayani Kiteto.

Agizo hilo la Mhe. Mnyeti limekuja baada ya wananchi wengi kulalamika juu ya ubadhilifu unaofanywa na viongozi wa hifadhi hiyo ,ambapo baadhi yao wamesema  kwamba  hawaelewi maana ya msitu huo wa SULEDO kwa sababu haunufaishi vijiji vinavyounda hifadhi hiyo,badala yake  unanufaisha watu wachache ambao ni viongozi wa hifadhi hiyo. Kwani mauzo yanayotokana na mazao ya Hifadhi hiyo hayajulikani yanakokwenda wala yanavyotumika. Vilevile  wananchi wa Sunya wamesema kwamba hawaelewi  mipaka halisi ya Msitu wa SULEDO  kwani wamekuwa wakiamriwa kuondoka kwenye mashamba yao wakiambiwa kwamba ni maeneo ya hifadhi  hali ya kuwa  wao ni wamiliki wa mashamba hayo kabla ya kuanzishwa kwa hifadhi hiyo. Kufuatia malalamiko ya wakazi wengi wa kata ya Sunya, Mheshimiwa Mnyeti anatoa agizo anasema ‘‘ malalamiko ya wananchi yanapokuwa mengi sana yanajenga chuki kati ya wananchi na serikali yao.Sasa mimi natoa agizo, mkuu wa wilaya nakupa siku 14  kushughulikia suala la SULEDO.Kuanzia sasa uongozi wa SULEDO  nimeuvunja .Halafu sasa kasimamie uongozi mpya upatikane ndani ya hizo siku 14”.

 Aidha Mhe. Mnyeti ameelekeza utaratibu utakaotumika katika kuchagua uongozi wa hifadhi hiyo  ambapo amemtaka Mkuu wa wilaya ya Kiteto  mheshimiwa Tumaini Magessa  kusimamia  mchakato wote wa upatikanaji wa uongozi huo mpya. Hapa Mhe. Mnyeti anasema‘‘.Nenda kasimamie  upatikanaji wa wajumbe watatu watatu kwenye kila kijiji.Nataka wewe ndio uende kwenye hiyo mikutano kwenye kila kijiji, uhakikishe akidi imetimia ,mwenyekiti yupo ,mtendaji wa kijiji yupo, wananchi wachague wenyewe kwamba sisi tunamwamini fulani  na fulani watuwakilishe kwenye SULEDO katika vijiji vyote 13”.

 Katika hatua nyingine Mhe. Mnyeti  pia amemtaka Mhe. Magessa   kuhakikisha kwamba baada ya kupatikana kwa uongozi mpya wa msitu huo , Afisa misitu na afisa wa  Wakala wa Huduma za Misitu ( TFS) wanatoa semina  kwa uongozi huo  kuwafundisha namna wanavyoweza kusimamia msitu wao,ili msitu huo uwanufaishe wananchi wote,kwani usipowanufaisha wote. Wananchi watauharibu. Akisisitiza juu ya umuhimu  wa hifadhi  hiyo kuwa na manufaa kwa wananchi wote, Mhe. Mnyeti anasema ‘‘Msitu huu usipowanufaisha wananchi wote,wataanza kuuharibu , na wakiuharibu serikali itawakamata, na ikiwakamata wananchi wanajenga chuki na serikali yao hali ya kuwa wataalamu wapo na watawala tupo”.

Msitu wa SULEDO ni msitu ambao  umeundwa na kata tatu za Sunya ,Lengatei na Dongo  ambapo wananchi toka vijiji 13 vya kata hizo walitoa ardhi ya vijiji vyao na kutenga kuwa msitu wa hifadhi ya jamii.

                                                                                   ............... MWISHO...............