Mkuu wa Mkoa wa Manyara Awataka Wanavijiji Kiteto Kuheshimu Mipango ya Matumizi Bora ya Ardhi.

Imetumwa : January 17th, 2018

                             Wakazi wa Kata ya Kijungu wakimsikiliza Mkuu wa Mkoa wa Manyara Mhe. Alexander Mnyeti Katika Mkutano wa Hadhara uliofanyika katika Kata ya Kijungu Wilayani Kiteto                                         

                                                                                                                  ................. HABARI KAMILI ..................

Mkuu wa Mkoa  wa Manyara  Awataka  Wanavijiji  Kiteto  Kuheshimu  Mipango ya Matumizi Bora ya  Ardhi.

Mkuu wa mkoa wa Manyara mheshimiwa Alexander Mnyeti  amewataka wananchi wanaoishi vijijini kuheshimu mipango ya matumizi bora ya ardhi  waliyojiwekea katika vijiji vyao. Mheshimiwa Mnyeti ameyasema hayo katika mkutano wa hadhara ulifanyika katika kata ya Kijungu ,wilayani Kiteto kufuatia kero zilizowasilishwa  na wananchi  katika mkutano huo wa hadhara ambapo kero kubwa ni migogoro inayohusu  wafugaji kuchungia kwenye  mashamba ya wakulima na kuweka makazi kwenye maeneo ya mashamba,wakulima kuanzisha mashamba katika maeneo ya malisho,pamoja na mashirika yasiyo ya kiserikali kutenga maeneo  ya hifadhi  bila utaratibu unaoeleweka na kusababisha baadhi ya wakulima kukosa maeneo ya kulima .

Akijibu kero hizo  Mhe. Mnyeti amesema kwamba matumizi bora ya  ardhi Katika vijijji yamepangwa na wanavijiji  wenyewe,lakini wanavijiji hao hao ndio hawataki kufuata matumizi hayo. Mahali popote ambapo wananchi wameweka mipango ya matumizi bora ya ardhi ,mipango hiyo iheshimiwe.Akitoa onyo kwa wanavijiji wanaotumia ardhi kinyume na mipango iliyowekwa Mhe. Mnyeti anasema “ Kuchungia kwenye mashamba ni kosa,kuvamia  maeneo ya malisho na kutengeneza mashamba ni kosa, watu waishi kwa kuheshimiana.Mkulima amheshimu mfugaji ,na mfugaji amheshimu mkulima.Tatizo kubwa ninaloliona katika wilaya hii ni matumizi  ya ardhi.Hili ni tatizo kubwa sana. Kama vijiji havikubaliani  na mipango  iliyopo sasa badilisheni. Mipango hiyo sio msahafu wala biblia , wanavijiji wakae  wabadilishe matumizi . Hata hivyo Mheshimiwa Mnyeti amewataka wanavijiji hao kufuata utaratibu katika kufanya mabadiliko hayo ambapo  anasema ‘‘ Mtu asibadilishe matumizi ya ardhi hadi vikao halali vikae vithibitishe mabadiliko hayo” Vilevile Mhe. Mnyeti amesema kwamba mabadiliko  ya matumizi ya ardhi yatakapokuwa yamekubalika watu wasibadilishe ili kuepusha migogoro. Sambamba na hayo Mhe. Mnyeti ametoa miezi mitatu kwa mkuu wa wilaya ya Kiteto Mhe. Tumaini Magessa kushirikana na wataalamu wa ardhi  wa halmashauri kukamilisha mchakato wa mabadiliko hayo.

Katika hatua nyingine Mhe. Mnyeti amewaagiza maafisa ugani  kufanya tathimini stahiki kila inapotokea uharibifu wa mazao unaosababishwa na wafugaji kuchungia katika mashamba, na wasimamie wahusika wa mashamba hayo kulipwa mara moja .Pia amemuagiza Mkuu wa Polisi Wilaya ya Kiteto SP Fadhili Luoga Kuwakamata wafugaji wote wanaofanya hivyo  pamoja na ng’ombe zote zilizofanya uharibifu  na kutoza faini kwa kila ng'ombe mmoja ili kukomesha vitendo hivyo.

Wilaya ya  Kiteto imekuwa na migogoro ya ardhi  ya muda mrefu ,migogoro ambayo inahusisha wakulima na wafugaji ,pamoja na kwamba kuna mipango ya matumizi bora ya ardhi ambayo imewekwa  na vijiji vya wilaya hiyo ambapo mipango hiyo  inaainisha maeneo ya kilimo, maeneo ya malisho na maeneo ya makazi.

                                                                                                                                   ................ MWISHO......................