Madiwani Kusimamia Upandaji Miti Kiteto

Imetumwa : March 29th, 2018

Mkuu wa wilaya ya Kiteto Mhe. Tumaini Magessa akitoa maelekezo kuhusu namna ya kutekeleza zoezi la upandaji miti.Katika uzinduzi wa zoezi hilo uliofanyika  katika  eneo la mlima simu - kijiji cha Njoro, wilayani Kiteto.

Mkuu wa wilaya ya Kiteto Mhe. Tumaini Magessa akipanda mti  kama ishara ya kuzindua  zoezi la upandaji miti .Tukio hili limefanyika  katika  eneo la mlima simu, kijiji cha Njoro wilayani Kiteto.

Mkuu wa wilaya ya Kiteto Mhe. Tumaini Magessa akiunyweshea maji mti alioupanda ,katika uzinduzi  wa zoezi la upandaji miti  uliofanyika  katika  eneo la mlima simu, kijiji cha Njoro wilayani Kiteto.

Mwenyekiti wa halmashauri ya wilaya ya Kiteto Mhe. Lairumbe Mollel  akipanda mti katika uzinduzi wa  zoezi la upandaji miti uliofanyika katika  eneo la mlima simu, kijiji cha Njoro wilayani Kiteto.

Mkurugenzi mtendaji wa halmashauri ya wilaya ya Kiteto Ndg. Tamim Kambona ( aliyevaa tisheti nyeupe yenye mistari ), waheshimiwa madiwani pamoja na watumishi wakiwa ndani ya basi lililowasafirisha kwenda katika uzinduzi wa zoezi la upandaji miti  uliofanyika katika eneo la mlima simu- kijiji cha Njoro, wilayani Kiteto.

Watumishi wa halmashauri ya wilaya ya Kiteto  baada ya kumaliza  kupanda miti katika uzinduzi wa  zoezi la upandaji miti  uliofanyika  katika  eneo la mlima simu, kijiji cha Njoro wilayani Kiteto.

Basi la Kampuni ya Struggle investment lililowasafirisha watumishi wa halmashauri ya wilaya ya Kiteto kwenda katika uzinduzi wa zoezi la upandaji miti uliofanyika katika eneo la mlima simu - kijiji cha Njoro  wilayani Kiteto.

..........HABARI KAMILI..........

Mkuu wa wilaya ya Kiteto Mheshimiwa Tumaini Magessa amewataka waheshimiwa madiwani kusimamia zoezi  la upandaji miti katika kata zao.Mhe. Magessa ametoa agizo hilo baada ya kuzindua  zoezi la  upandaji miti  ,uzinduzi  ambao  umefanyika katika  eneo la mlima  wenye   minara ya simu maarufu kama  mlima simu - kijiji cha Njoro , kata ya Njoro wilayani Kiteto  mapema leo.

Akizungumza mara baada ya uzinduzi huo Mhe. Magessa amesema kwamba zoezi hilo la upandaji miti ni la kitaifa na kwamba kila wilaya inatakiwa kupanda miti isiyopungua 1,500,000.katika kuhakikisha kwamba zoezi hilo linatekelezwa Mhe. Magessa  ametoa maelekezo ya namna ambavyo kazi hiyo itafanyika .Haya hapa ni maelekezo ya Mhe. Magessa ‘‘Tunatakiwa kupanda miche 1,500,000 katika wilaya yetu. Tumeitana hapa sio  kwa sababu ya kuonyesha kwamba tunapanda nini leo,shida yetu kubwa ni kuanza kupanda miti leo.Katika eneo hili leo tutapanda miti 500,baada ya kumaliza hapa , zoezi hili linahamia kwenye kata. Tuna kata 23, kila kata itapanda miti 500. Kila diwani aliye hapa  anakwenda kwenye kata yake kuhakikisha kwamba idadi ya miti aliyoambiwa kupanda  anaipanda kwenye kata yake.Hili lifanyike kabla  ya kuisha mwezi  wa 4”.

Naye mwenyekiti wa halmashauri ya wilaya ya Kiteto Mhe. Lairumbe Mollel amesema kwamba  zoezi hilo liwe endelevu  kwa wananchi wa Kiteto,wapande miti kweye maeneo yao yote, maeneo ya taasisi pamoja na makazi yao ili kurudisha uoto wa asili.Akizungumzia madhara yaliyosababishwa na ukataji miti ovyo ambao ulikuwa ukifanyika siku za nyuma, Mhe Mollel amesema “tulifika mahali hali ilikuwa mbaya, hata mabadiliko ya tabia nchi yamesababishwa na ukataji miti.Lakini naamini wananchi wa Kiteto wamejifunza, wamejua madhara ya ukataji miti, na umuhimu wa kupanda miti.Wito wangu kwao ni kwamba tupande miti, tutunze mazingira ili tuweze kurudisha hali ya Kiteto kama ilivyokuwa zamani”.

Kadhalika mkurugenzi wa halmashauri ya wilaya ya Kiteto ndugu Tamimu Kambona amesema kwamba zoezi hilo la upandaji miti ni  la kitaifa,na wao kama halmashauri wamekwenda na watumishi katika uzinduzi wa zoezi hilo  kwani watumishi ndio kioo cha jamii. Na kwamba watu wengi ambao sio  watumishi wa serikali wanaangalia watumishi wanafanya nini ndipo na wao wafanye. Hivyo kitendo  cha  watumishi kushiriki katika uzinduzi huo kitawapa hamasa wananchi kujitokeza kwa wingi katika utekelezaji wa zoezi hilo. Aidha ndugu Kambona ameutaka Wakala wa Huduma za Misitu Tanzania ( TFS) kulipa deni inalodaiwa na halmashauri ya wilaya ya Kiteto kiasi cha shilingi 42,000,000 (milioni arobaini na mbili)  ili fedha hizo zitumike katika uendelezaji  wa zoezi la kupanda miti wilayani Kiteto.

Zoezi hilo la upandaji miti litaendelea kufanyika katika maeneo mbalimbali wilayani Kiteto ndani ya mwezi April ,na linatarajiwa kurudiwa tena mwezi Julai 2018.

..........HABARI KAMILI..........